हाम्रो पुरुषार्थ अंक ८५
कोरोनाको कहर
एउटा महाव्यथा, एउटा महामारीको त्रासदीबाट विश्व त्रस्त्त भएको छ अहिले । महाचीनबाट प्रकट भएको कोविड–१९ कोरोना भाइरसले अहिले विश्वमानवलाई पिरोलेको छ, आतंकित तुल्याएको छ । यसले अहिले करोडौंलाई त्रस्त बनाएको छ, लाखौंलाई ग्रस्त बनाएको छ र हजारौंलाई मृत्युको मुखमा धकेलेको छ ।
चीनदेखि यूरोप–अमेरिकासम्म कोरिया जापान भारत र अरबको खाडीसम्म कोरोनाको कहर व्याप्त छ । कालसर्प झैं फणा उठाएर कोरोना मानव जातिमाथि आक्रामक बनेको छ । कोरोनाले विश्वलाई नै भयभीत र अस्तव्यस्त बनाएको छ । भयभीत छौं हामी पनि । खतरामा छौं हामी पनि ।
विकसित र साधनसम्पन्न राष्ट्रहरुलाई समेत अत्याएको कोरोना हाम्रोमा पस्यो भने उत्पात मच्चिन सक्छ । हामी साधनहीन छौं । अनुशासनले, धैर्यले, मन्त्रबलले, औषधले, आचरणले हामी कोरोनासँग सामना गर्नुपर्छ ।
कोरोनाको कालसर्पले फैलाएको विषले अहिले संसारलाई जलाइरहेछ । प्राचीन कालमा कालकूट जस्ता विषहरु निस्केर संसारलाई पिरोलेका थिए । लोककल्याणार्थ शिवले पिएथे कालकूट नीलकण्ठ बनेर । हामी नीलकण्ठको धाममा छांै । जगत्को रक्षा गर नीलकण्ठ !
आ वात वाहि भेषजं वि वात वाहि यद्रपः त्वं हि विश्वभेषज देवानां दूत ईयसे । – अथर्ववेद ।
हे वायु ! औषधिका थोपाहरु उडाएर ल्याऊ ! तिमी विश्वका औषध हौ र देवताका दूत हौ ।
पुरै पुस्तक डाउनलोड गर्नुहोस.. यहाँ पढ्नुहोस