किरण पुस्तकालय

टुक्राटुक्रामा विभाजित यस हिमवत्खण्डलाई जसले एकताको सूत्रमा उन्यो । जसले सजायो यस सुन्दर फूलबारीलाई । जसले जोड्यो मनहरुलाई विशाल राष्ट्रको भावनामा । जसले चिनायो राष्ट्रको शान र मानलाई । जसले त्यस युगमा पनि सुशासन र देशोन्नतिको सपना देख्यो । त्यस्तो पृथ्वीलाई हामी आज पनि राष्ट्रिय एकताको शान र मान भनेर सम्झिरहन्छौं ।

देशहरु मेटिइरहेका थिए । मिसिइरहेका थिए – साम्राज्यमा । पहिचान र मान मिचिइरहेका थिए – देशका । हामी यता बाइसी–चौबीसी बनेर आपसमा लडिरहेका थियौं । लडेर दुर्बल बनिरहेका थियौं । भारत जितेर निस्किरहेको थियो अंग्रेजी साम्राज्य । समय बुझेर पृथ्वी उठे, वीरहरु जुटे । एउटा एकताको सूत्र उनियो । एउटा अभियान उठ्यो राष्ट्रएकीकरणको । नायक बने पृथ्वी ।

हरेक राष्ट्रका जगमा बलिदान र वीरताका गाथा छन् । राष्ट्रनिर्माणका पात्रहरु अनेक छन् । सूत्रधार र नायक हुन् पृथ्वी । राष्ट्रनिर्माणमा धेरैको पसिना बगेको छ, रगत बगेको छ । पुस २७ गते राष्ट्रिय एकता दिवस मान्छौं हामी । यस दिवसले ती उज्ज्वल पुर्खाहरुलाई सम्झाउँछ – जसको साना दुःखले यो राष्ट्र बनेको होइन । ठूला दुःखले बनेको हो यो राष्ट्र ।

पृथ्वीसँग खानी खनेर देश धनी बनाउने चाह थियो । स्वदेशमै कपडा बुनेर देशलाई सम्पन्न र स्वाभिमानी बनाउने चाह थियो । भ्रष्टाचारीलाई दण्ड दिने चाह थियो । उनका यी चाहनाहरु अधुरै रहे आजसम्म । उनका यी सपनाहरु विपना बन्न सकेनन् आजसम्म । युग फेरिए; तन्त्र फेरिए; मन्त्र फेरिए; पात्र फेरिए; पत्र फेरिए तर खोइ अब त कसैले सपना पनि देख्न छाडे ।

राष्ट्रिय एकता दिवसले हाम्रो यो विविधतामय फूलबारीलाई सुन्दर र समुन्नत बन्ने सन्देश ल्याओस् । राष्ट्रभक्तिको मियोमा हामी जुटौं, घुमौं र देशोत्थानको अनुष्ठानमा लागौं । एकता दिवस र पृथ्वीको सन्देश यहीं हो हामीलाई । देशनिर्मातालाई सम्मान गरौं ।