मुख्य सामग्रीमा जानुहोस्

← हाम्रो पुरुषार्थ अंक ९६ मा फर्कनुहोस्

हाम्रो पुरुषार्थ अंक ९६ · गीत/कविता/गजल/मुक्तक · पृ. २४

आधिव्याधिना प्रपीडितेन कर्त्रा नित्यमेव करणीया प्रार्थना

डा. लक्ष्मीकान्त पन्थी

उद्यत्सूर्य ! विवस्वतेऽत्र भवते पुण्यात्मने भास्वते

लोकान् जागरणात्मने दिनकृते कालात्मने शाश्वते ।

त्वं सच्चित् सुखकारणं त्रिजगतो वेदात्मने ज्ञानिने

सानन्दोऽसि निरामयोऽसि भगवन् ! ध्यायामि तुभ्यं नमः ।।१।।

उद्यत्सूर्य ! नमाम्यहं प्रथमतो नत्वा भवन्तं पुनर्

वक्तव्यं परिमार्जितं शृणु यतो रोगैर्भृशं पीडितः ।

तत्पीडानुभवादहं तु किमतः कर्तुं न कार्यक्षमः

तस्मादत्र भवन्तमेव कलये संप्रार्थये चान्वहम् ।।२।।

उद्यत्सूर्य ! तमो निरस्यतु जगत् ते भास्वता काश्यताम्

अर्घं तेऽर्पयितुं कथं कथमपि नाहं क्षमः क्षम्यताम् ।

गायत्रीमपि जप्तुमेकमनसा नाहं क्षमः क्षम्यताम्

सन्ध्यावन्दन ! भद्रमस्तु भवते भो स्नान ! तुभ्यं नमः ।।३।।

भो देवाः पितरश्च तर्पणविधौ नाहं क्षमः क्षम्यताम्

पाठं चाप्यधुना तदेकमनसा कर्तुं न चाहं क्षमः ।

यत्र क्वापि निषद्य यादवकुलोत्तंसस्य कंसद्विषः

स्मारं स्मारमघं हरामि सकलं मन्ये किमन्येन मे ।।४।।

← हाम्रो पुरुषार्थ अंक ९६ मा फर्कनुहोस्