हाम्रो पुरुषार्थ अंक ८३
भानु चम्काउने मोती
नेपाली साहित्यको आकाशमा भानु अस्ताएपछि चम्केका उज्ज्वल नक्षत्र हुन् मोती । मोती आफूमात्र चम्केनन् साहित्यमा । मोती आफूमात्र हिंडेनन् साहित्यमार्गमा । मोतीले भानुलाई चम्काए, मोतीमण्डली बनाई मित्रहरुलाई पनि हिडाले आफ्नो बाटोमा ।
छोटा आयुमा बडा काम गर्छन् यशस्वीहरु । तीस वर्षको उमेरमा एउटा युगको निर्माण गरे मोतीले । एउटा धारालाई बगाए मोतीले । विभूति हुन् मोती हाम्रा । नक्षत्र हुन् हाम्रा उज्यला । रत्न हुन् हाम्रा उम्दा । उनी छन् अनुपम आफैमा । हामी भन्छौं, उनी हुन्–शंकराचार्य झैं, विवेकानन्द झैं, कीट्स झैं, शेली झैं ।
उनी हुन् प्रथम गजलकार हाम्रा । उनी हुन् प्रथम पत्रकार राम्रा । उनी हुन् प्रथम समीक्षक द्रष्टा । उनी हुन्–शृङ्गाररसका अनुपम स्रष्टा । शृङ्गाररसको सुमधुर धारा बग्यो उनीबाट । नेपाली भाषाका कवि–कोकिल हुन् उनी ।
नेपाली साहित्यको माध्यमिक कालका सर्वश्रेष्ठ कवि मोतीले नेपाली भाषासाहित्यको विकासमा दिएको योगदान अपूर्व छ । मुद्रण युगको प्रारम्भसँगै उनी उदाए । लुप्तगुप्त प्रतिभाको खोजी गरे उनले । नेपाली कवितामा रागात्मक कविता सृजेर साहित्यमा चाख जगाए । एउटा सिंगो युग बोकेका छन् मोतीले साहित्यमा ।
काठमाडौंमा जन्मेर बनारसमा पढेका मोतीमा हिन्दीका भारतेन्दु हरिश्चन्द्रको प्रभाव परेको छ । फारसी जानेका मोतीले त्यतैबाट नेपालीमा गजल भित्र्याए । नेपाली साहित्यको इतिहासमा अजरामर छन् मोती । मोतीको प्रकाशमा बाटो पहिलाएथ्यो नेपाली भाषा र साहित्यले । राष्ट्रका विभूति मोतीको १५४ औं जन्मजयन्तीको अवसरमा उनको अमर आत्माप्रति हार्दिक श्रद्धाञ्जलि ।
पुरै पुस्तक डाउनलोड गर्नुहोस.. यहाँ पढ्नुहोस